ពលរដ្ឋខ្មែរម្នាក់បានស្លាប់ដោយទាហ៊ានឈុតខ្មៅថៃបាញ់សម្លាប់​ ឯ៦នាក់ទៀតរួចខ្លួន ខណៈឆ្លងដែនចូលកាប់ឈើ

ពោធិ៍សាត់ ៖ យ៉ាងហោចណាស់ មានប្រជាពលរដ្ឋខ្មែរម្នាក់បានស្លាប់ ហើយ ៦នាក់ទៀត រត់គេចខ្លួនដោយសុវត្ថិភាព ខណៈពួកគាត់ឆ្លងដែន ចូលកាប់ឈើ ខុសច្បាប់ ក្នុងទឹកដីថៃ ហើយត្រូវទាហាន ឈុតខ្មៅថៃ ដេញបាញ់ ។ ហេតុការណ៍នេះ កើតឡើងកាលពីវេលាម៉ោង ៣រសៀល ថ្ងៃទី២០ ខែកក្កដា ឆ្នាំ២០១៦ នៅលើទឹកដីថៃ ខេត្តត្រាត ទល់មុខ ចំណុច ភ្លុកដំរី ក្នុងនិយាមការ TU (50159, 43790) ។

ប្រភពព័ត៌មានពីកម្លាំងសមត្ថកិច្ច នៃវរៈការពារព្រំដែន ៨២៥ ទទួលទិសថ្មដា បានប្រាប់ ឲ្យដឹងថា ជនរងគ្រោះ ដែលទាន់ឈុតខ្មៅថៃ បាញ់សម្លាប់ចំនួន ២គ្រាប់ ចំជើង១គ្រាប់ ចំកន្លែង បោះដៃ ផុត ១គ្រាប់ នោះ មានឈ្មោះ តេង សល្យ ភេទប្រុស អាយុ ៣៥ឆ្នាំ រស់ភូមិភ្នំ៧ ឃុំបួរ ស្រុកភ្នំព្រឹក ខេត្តបាត់ដំបង។

ប្រភពបានបន្តថា មានបុរស ៦នាក់ទៀត ដែលចូលរួម ទៅកាប់ឈើ ក្រញ៉ូង ខុសច្បាប់ ហើយត្រូវបានទាហានឈុតខ្មៅថៃបាញ់ រត់ចែកជើងគ្នាដោយសុវត្ថិភាព ដោយដកហូតឈើក្រញ៉ូងចំនួន ៥ដុំ ម៉ាស៊ីនត្រង់ស៊ីន័រ ១គ្រឿង។ យ៉ាងណាមិញប្រភពព័ត៌មាន មិនទាន់បានបញ្ជាក់ពីអត្តសញ្ញាណរបស់ពលរដ្ឋទាំង ៦នាក់នោះទេ។

ក្រោយពេលកើតហេតុ កម្លាំងសមត្ថកិច្ចកម្ពុជា បានទំនាក់ទំនងទៅ សមត្ថកិច្ចថៃ ហើយបានចុះទៅពិនិត្យ និងទទួលសាកសព នៅទឹកដីថៃ មកទឹកដីខ្មែរវិញ។

ពលរដ្ឋខ្មែរ មិនមែនជា សត្វធាតុ ដែលត្រូវបាញ់សម្លាប់ តាមអំពើចិត្តនោះទេ ទោះយ៉ាងណាបើខុសច្បាប់ មែននោះ សូមឃាត់ចាប់ រួចទុកឲ្យច្បាប់ ជាអ្នកកាត់ទោសចុះ ដូច្នេះមន្រ្តីកម្ពុជា-ថៃ ត្រូវតែរកយុត្តិធម៌ជូនជនរងគ្រោះវិញ ។

}